A central hidroeléctrica de Belesar parará para buscar o mozo desaparecido hai 15 días

A central hidroeléctrica de Belesar parará temporalmente para comprobar a zona da comporta da presa dentro dos labores de procura do mozo desaparecido hai quince días ao envorcar o caiac en que navegaba xunto ao seu curmán nas inmediacións do encoro, á altura do municipio de Carballedo.

Así o confirmou a edila do Goberno local de Carballedo Alba Pérez Iglesias, que está a seguir na zona os labores de procura do mozo desaparecido, coordinadas pola Garda Civil.

A concelleira explicou que agora mesmo están a traballar no encoro, na zona onde envorcou o caiac, dous robots chegados desde Madrid, "que teñen capacidade para baixar a diferentes profundidades". Aclarou que ambos os equipos están a peitear outra vez a “zona onde desapareceu” o mozo.

Tamén seguen na zona efectivos do Grupo Especial de Actividades Subacuáticas (GEAS) da Garda Civil. “Viñeron máis, había grupos de catro, pero hoxe hai máis e onte tamén houbo máis”.

Ademais, agora tamén hai no encoro “dúas embarcacións da Garda Civil”, unha “que xa estaba” e outra que “que veu onte pola tarde de Asturias”.

Agora, explicou, “van parar a central hidroeléctrica” para “comprobar a zona da comporta”. Aínda que “se supón que é raro que estea aí”, tampouco se descarta, precisou, de modo que “van mirar”.

O mozo desapareceu hai quince días en augas do río Miño, ao envorcar o caiac en que navegaba co seu curmán preto do encoro de Belesar.

O outro mozo conseguiu chegar a terra e pedir auxilio tras o accidente, que se produciu pasadas as catro e media da tarde, á altura do lugar da Carballeira, na parroquia da Cova, que pertence ao municipio lucense de Carballedo.

O alcalde da localidade, Julio Yebra-Pimental, explicou que a complicada orografía da zona, con pronunciadas pendentes e moita vexetación, dificulta enormemente a procura por terra.

Por este motivo, desde o primeiro momento fíxose necesario o uso de medios acuáticos e aéreos para avanzar nos labores de localización.

De feito, nos labores de rastreo tamén participou nos últimos días o Grupo Loxístico da Axencia Galega para as Emerxencias (Axega), que opera con drons para buscar a persoa desaparecida desde o aire.