Drons de Axega únense aos mergulladores na busca do mozo desaparecido no Miño

A Unidade Operativa de Drons (UOD) da Axencia Galega de Emerxencias (Axega) incorporouse este mércores aos traballos de procura do mozo desaparecido no río Miño tras envorcar o seu caiac, preto do encoro dos Peares.

Axega tamén puxo ao dispor do operativo, que dirixe a Garda Civil, o seu dron subacuático, que queda á espera de ser requirido en función das necesidades técnicas da busca, segundo recolle o 112 Galicia.

A deste mércores é a terceira xornada de procura deste operativo que principiou o luns. Ese día o curmán do mozo, que viaxaba con el, puido chegar a terra e pedir auxilio. Pasadas as 16.30 horas, un particular foi o que avisou ao 112.

Sairan en caiac do embarcadoiro dos Peares 

Segundo a información da Garda Civil, os mozos saíron en caiac do embarcadoiro dos Peares, remontaron o río e, cando volvían, sufriron o accidente. Un dos seus helicópteros localizou a embarcación o propio luns no marco dun operativo que explora unha zona que, segundo o 112, é "especialmente complexa" pola súa escarpada orografía.

Tras recibir o aviso, a central de emerxencias activou un amplo operativo que coordina a Garda Civil e para o que se deu aviso aos Bombeiros de Chantada, Monforte e Ourense; o GES de Ribadavia; Protección Civil de Parada de Sil, do Saviñao e de Monforte de Lemos, e persoal do Servizo de Urxencias Sanitarias-061.

Ademais, o Grupo de Intervención Psicolóxica en Catástrofes e Emerxencias (GIPCE) foi informado por se fose necesario intervir para atender os familiares do desaparecido.