Oito persoas feridas, entre elas un bebé, na colisión de catro coches en Mos
Dous coches bateron por alcance e os outros dous en cadea na A-55 que une Vigo con Tui
Oito persoas, sete adultas e un bebé, quedaron feridas tras a colisión de catro vehículos na A-55, á altura do concello de Mos. Todas foron trasladadas a distintos centros hospitalarios.
O accidente múltiple ocorreu pasadas as 23:00 horas no quilómetro 9 da autovía que une Vigo con Tui, en dirección ao Porriño. Ata o lugar desprazáronse os servizos sanitarios, a Garda Civil de Tráfico e o GES local.
Segundo informa o Grupo de Emerxencias Supramunicipal de Mos, dous coches bateron por alcance e os outros dous en cadea.
Un pouco máis tarde, contra a medianoite, un turismo envorcou en Castro Caldelas, no quilómetro 45 da OU-536. O condutor quedou atrapado e tivo que ser excarcerado. Despois, o ferido foi trasladado a un hospital.
