Topan o corpo dun bebé nunha casa de Allariz que puido morrer hai décadas

A Garda Civil está a investigar a aparición duns restos mortais, que poderían tratarse dun bebé ou dun feto, nun inmoble da vila ourensá de Allariz. O caso está baixo segredo xudicial, polo que son poucos os datos que transcenderon.

O que si confirmaron fontes da investigación é que o corpo envíouse ao Instituto de Medicina Legal, que terá que confirmar a idade, o tempo que levaba no lugar e, a través das mostras de ADN, quen poderían ser os pais biolóxicos.

Segundo diversas informacións, o corpo do bebé estaba agochado no interior dunha arca conxeladora, nos trasteiros dun garaxe, e foi unha muller a que o atopou ao rexistrar as pertenzas dunha familiar falecida.

Supostamente, os restos mortais poderían levar varias décadas no lugar, aínda que foi esta semana cando a veciña os descubriu. As primeiras estimacións apuntan a que se trataría dun feto dunhas 32 semanas de xestación.

A noticia está a producir unha grande expectación entre a veciñanza aínda que prefiren non pronunciarse publicamente sobre o achado. As dilixencias remitíronse aos xulgados de Ourense, que decretaron o segredo das actuacións.