Desarticulan unha banda que enganou un narco de Narón vendéndolle cemento en vez de cocaína

A Garda Civil da Coruña desarticulou unha rede dedicada á distribución e vuelcos de droga en Galicia. Hai doce persoas detidas e outras dúas están sendo investigadas por tráfico de drogas, pertenza a organización criminal, branqueo de capitais e tenza ilícita de armas.

A banda enganou un veciño de Narón, que pagou 255.000 euros por 30 quilos de cocaína, dos cales 29 resultaron ser cemento en po. Así mesmo, o grupo intentou realizar vuelcos violentos con armas de fogo contra outros clans para roubarlles mercadoría ou diñeiro.

A investigación iniciouse tras descubrir un mozo de Vilagarcía de Arousa que utilizaba terceiras persoas para o transporte de cocaína e a xestión de plantacións de marihuana. Posteriormente, os axentes comprobaron que estaba conectado con varios veciños de Ferrol e Narón vinculados ao crime organizado.

Durante os nove meses que durou o caso, os investigadores acreditaron que a organización realizaba entregas de droga en varias localidades galegas, principalmente na comarca do Salnés, Ferrol, Narón, A Coruña e Betanzos, ademais de realizar transportes puntuais a Zamora.

Os investigadores interceptaron a finais de outubro un vehículo na comarca do Salnés con cocaína oculta, o que supuxo a detención de tres integrantes para os que o xulgado decretou ingreso en prisión provisional sen fianza.

A operación saldouse cun balance total de 14 persoas implicadas, das cales 12 foron detidas e dúas resultaron investigadas. Nos rexistros incautáronse de diversas substancias como cocaína, haxix, MDMA e heroína, ademais de seis armas de fogo, abundante munición, doce vehículos -dous deles de alta gama- e arredor de 138.000 euros en efectivo.

Cinco dos doce detidos ingresaron en prisión provisional tras pasar a disposición xudicial en Betanzos.