Volven aparecer danos en coches aparcados na contorna do aeroporto de Santiago

A policía detectou os danos ao recibir a primeira e única denuncia polo momento: cinco vehículos estacionados nunha pista na contorna do aeroporto de Santiago apareceron con aboladuras no teito. É o último episodio do conflito cos estacionamentos no lugar da Lavacolla. 

"Xa apareceron varios coches raiados, outros picados, e parece que desta vez foi máis grave", explica unha hostaleira da zona. "Hai uns meses picaron vinte rodas na gasolineira", di Santiago López, propietario dunha empresa de aparcadoiro.

Ce que os danos poden estar relacionados cunha empresa ilegal que opera na zona: ofrecen un servizo de aparcadoiro, e deixan os coches estacionados onde cadre. Sobre eles xa pesan varias denuncias, pero cren os veciños que estes danos puido ocasionalos alguén que quixo tomar a xustiza pola súa man. 

Veciños e traballadores están desesperados co caos cos aparcadoiros. Din que o problema vén de anos atrás, e que malia que se agravou coas prácticas desta empresa ilegal, tamén os particulares contribúen a empeoralo. 

A Policía Nacional investiga os danos a estes cinco vehículos, e todas as hipóteses están abertas. De momento só teñen a denuncia da única persoa que xa retirou o coche, e confirman que non era clienta desa empresa ilegal de aparcadoiro.