Un prolongado silencio en Traspinedo, en memoria de Esther López

A localidade de Traspinedo segue consternada tras o achado do cadáver de Esther López despois de 24 días de intensa busca. Este mediodía a corporación muncipal decretaba tres días de loito oficial e centos de veciños concentrábanse na praza do concello. Alí gardaban un prolongado silencio dedicado á memoria de Esther. Piden que se faga xustiza.

Ás doce da mañá o concello de Traspinedo, localidade dalgo máis de 1.100 habitantes, celebraba un pleno extraordinario no que declaraba tres días de loito oficial para amosar a dor pola tráxica morte de Esther López. 

A corporación municipal gardaba un minuto de silencio. O alcalde dedicaba despois unhas emotivas palabras a Esther e pedía "xustiza".

"Esther nunca esqueceremos o teu eterno sorriso e non imos parar ata que se faga xustiza. Ten por seguro que a vila vai estar sempre á altura por ti e pola túa familia", dixo Javier Fernández, alcalde de Traspinedo.

Na praza do concello flores, candeas, crespóns negros e bandeiras a media hasta acompañaban unha fotografía de Esther.

Alí concentrábanse centos de veciños e achegados da familia que gardaban un silencio prolongado de cinco minutos, só roto ao final cun longo aplauso, como mostra de apoio e afecto á familia. O alcalde volvía pedir paciencia e calma aos veciños para deixar traballar aos investigadores.

"Desde un concello, unha institución pública o que hai que pedir é que haxa temperanza e mesura e que se deixe traballar á Xustiza. É un caso tráxico e é a Xustiza  a que ten que ditaminar como foron os feitos e se hai algún culpable que saia á luz", incidiu Javier Fernández.

Entre os veciños á dor e á indignación uniuse a incerteza ante un caso con moitos interrogantes aínda por esclarecer.

A familia de Esther agradeceu este domingo nunha carta aberta o apoio recibido e pedía respecto á súa dor para "chorar na intimidade" a morte da súa filla.