Un barco de rutas turísticas queda varado no río Ulla
Non houbo persoas feridas nin verteduras e o armador terá que retiralo cando volva subir a marea
Un antigo barco bateeiro que na actualidade está destinado a rutas turísticas quedou varado no río Ulla, sen que se rexistrasen persoas feridas.
Segundo informaron fontes de Salvamento Marítimo, foi sobre as 12.50 horas deste mércores cando o patrón doutra embarcación deu a voz de alarma e indicou que non había ninguén a bordo do barco.
Ata o punto, na zona de Isorna, desprazáronse dous voluntarios de Protección Civil de Rianxo para realizar tarefas de apoio a Salvamento Marítimo.
Alí comprobaron o estado da embarcación e verificaron que non existían verteduras nin perdas de combustible que puidesen supoñer un risco para o medio mariño e a contorna.
Agora, segundo detallaron as mesmas fontes de Salvamento Marítimo, o armador deberá sacar o barco na seguinte preamar.
