O Goberno anticipa que o desconto aos carburantes se vai prolongar para todos

A vicepresidenta terceira do Goberno e ministra para a Transición Ecolóxica, Teresa Ribera, asegurou este mércores que, a 15 días de que expire a bonificación aos carburantes, ese desconto vaise manter con carácter universal, mentres non se dá coa fórmula para a súa aplicación a certos colectivos.

"Todo parece, por agora, que o recomendable é seguir mantendo ese desconto xeneralizado", apuntou Ribera en declaracións a Telecinco, ao ser preguntada pola permanencia da bonificación de 20 céntimos por litro de carburante.

Segundo explicou, os equipos técnicos do Goberno levan tempo traballando para tratar de atopar unha fórmula que permita "focalizar máis o esforzo nos colectivos profesionais, nos grupos máis vulnerables ou nas clases medias, sempre sabendo que o máis importante é que a medida sexa eficaz".

"Se non conseguimos atopar o modo no que dirixir de maneira clara esta medida, seguiremos mantendo o apoio, o reforzo, o acompañamento ao conxunto da sociedade española nos mesmos termos nos que o fixemos nestes tres últimos meses", engadiu.

O sistema actual lévase aplicando desde o 1 de abril, en liña co que fixeron tamén outros países europeos para tratar de conter o efecto nos petos da escalada que sofre o petróleo tras a invasión rusa de Ucraína. Non obstante a medida non puido evitar que o prezo dos carburantes estea en máximos históricos.