Tres detidos por obrigar un mozo a subir á Muralla de Lugo, pegarlle e roubalo
Roubáronlle o móbil, unha cadea de prata e as chaves da súa casa
Os tres quedaron á disposición da autoridade xudicial
Tres mozos foron detidos por axentes do Corpo Nacional de Policía de Lugo como investigados por un suposto delito de roubo con violencia e intimidación, dado que son sospeitosos de obrigar outro rapaz a subir ao adarve da Muralla romana, onde lle deron unha malleira e roubáronlle o móbil e outros efectos persoais.
Segundo a información facilitada este venres pola Comisaría Provincial de Lugo, os feitos polos que foron detidos sucederon na madrugada do pasado 10 de xuño.
A vítima regresaba á casa despois de saír esa noite. Cando camiñaba pola praza de Campo Castelo, no centro histórico da cidade, foi abordado por tres mozos, que levaban a cara tapada con pasamontañas.
Golpeárono e fixérono subir á forza ao adarve da Muralla romana de Lugo, na zona da Mosqueira.
Alí, segundo informou a Policía Nacional, déronlle unha malleira e roubáronlle o móbil, unha cadea de prata e as chaves da súa casa.
Tras a correspondente denuncia, púxose en marcha unha investigación policial e os axentes encargados do caso identificaron no transcurso das súas pescudas aos tres sospeitosos, que foron posteriormente localizados e detidos.
Os tres quedaron á disposición da autoridade xudicial.
