Desartellan un grupo criminal vinculado a múltiples roubos con forza en vivendas de Galicia

A Garda Civil, no marco da operación VIPORTO, desarticulou un grupo criminal itinerante de orixe albanesa, especializado na comisión de roubos con forza en 14 vivendas, nas provincias de Pontevedra e A Coruña.

A investigación foi desenvolta polo Grupo de Patrimonio da Unidade Orgánica de Policía Xudicial da Comandancia de Pontevedra, baixo a dirección do Xulgado de Instrucción Nº 2.

Iniciouse o pasado mes de decembro, tras detectarse un considerable aumento de roubos con forza no interior de vivendas habitadas durante os últimos meses do ano na provincia.

As primeiras xestións permitiron aos investigadores centrar as súas sospeitas nun grupo criminal internacional, que se atopaba asentado de forma eventual en Vigo, desde onde planificaba e executaba os roubos.

O grupo presentaba un alto grao de organización e estrutura, propio da delincuencia organizada, cunha clara repartición de roles .

Un deles encargábase dos labores loxísticos, xestionando vivendas e vehículos de alugueiro, realizando o transporte do resto de membros ata as localidades onde estaban as vivendas afectadas.

Unha vez no lugar, dous deles desprazábanse monte a través ata unha zona de vivendas, percorrendo varios quilómetros a pé, accedendo habitualmente ao interior das mesmas mediante apancamento dalgunha das súas xanelas.

O condutor desprazábase a zonas comerciais, onde permanecía durante horas pasando totalmente desapercibido, regresando máis tarde a un punto de encontro previamente establecido para recoller os autores materiais do roubo.

Seleccionaban preferentemente vivendas situadas en zonas rurais ou illadas, moi próximas a áreas forestais, o que dificultaba a súa detección e facilitaba unha rápida fuxida.

Adoptaban importantes medidas de seguridade, cambiando de vivenda e de vehículo ata en catro ocasións en menos dun mes, co obxectivo de evitar seguimentos policiais.

Estaban permanentemente conectados e apenas saían do domicilio para minimizar o tempo de exposición en vía pública. A súa actividade delituosa centrábase principalmente na subtracción de xoias, ouro e diñeiro en efectivo.

Desde o momento da súa detección, e a pesar das dificultades derivadas das medidas de seguridade adoptadas polo grupo, os investigados foron sometidos a un constante seguimento policial, que permitiu vincular os agora detidos coa totalidade dos feitos investigados.

Os principais roubos tiveron lugar en Pontevedra, Redondela, Vilaboa, Santiago e Trazo (A Coruña).

Como resultado da explotación da Operación VIPORTO, durante os días 27 e 28 de xaneiro, levaron a cabo dous rexistros domiciliarios nas localidades de Vigo e Torrevieja (Alacante), procedendo á detención dos catro integrantes do grupo criminal.

Interviñéronse xoias, reloxos, diñeiro en metálico, efectos persoais, dispositivos móbiles, tarxetas SIM, 14kgs de marihuana, así como ferramentas utilizadas para a comisión dos roubos.  Ademais localizouse un zulo nunha zona forestal que contiña diversos reloxos.

Un dos detidos ten antecedentes policiais e xudiciais en España, así como cunha prohibición de entrada en territorio nacional.

A operación continúa aberta e non se descarta a vinculación deste grupo criminal con outros roubos ocorridos en Galicia durante os últimos meses do ano 2025. 

Os catro detidos xa ingresaron en prisión. 

Imaxe cedida pola Garda Civil