Cae unha banda que roubaba en casas na contorna de Pontevedra

Traballan rápido, de maneira organizada e sen apenas deixar pegadas.

"A persiana do baño estaba levantada e a contra rompida".

"Deixan todo tirado, todo aberto... non lles queda nada sen abrir, sobres e todo, pero ao mesmo tempo, ves que actúan moi rápido", contan nai e filla, vítimas dun asalto.

Mesmo método noutra vivenda non moi lonxe. Todo apunta a profesionais, que vixían o seu obxectivo durante días. Saben cando entrar, e no rural téñeno especialmente fácil. 

"Sempre aproveitan estes sitios máis retirados, nos que as casas están máis afastadas unhas doutras. Esta xente está preparada e vixíate. Saben quen está, quen non está", confirma a veciña doutras vítimas.

"Como na casa do lado non vive ninguén, foi a zona máis sinxela, e coa terraza non tiveron nin que saltar. Subiron pola terraza e accederon facilmente á ventá do baño", engade a moza.

Tiran con todo en busca de cartos e xoias. Non lles interesa nada máis.

"Eu teño un ordenador e tiña medo porque traballo con menores e teño informes e estaba o ordenador e enriba as miñas lentes, e levou só as lentes. Tamén temos nun cuarto un ordenador grande de torre e tampouco o levaron. Viñan por cartos rápidos e fáciles que había á vista e por xoias. Ouro", confirma a filla da familia asaltada.

A banda que caeu en Vigo actuaba nas Rías Baixas e, en xeral, por toda a contorna de Pontevedra. Hai catro detidos, un deles fóra da provincia. 

Aínda non se sabe se tamén son os responsables destes roubos na zona de Marcón e Tomeza, onde levan xa uns meses de susto en susto.

"Hai unha casa aquí que é duns veciños que viven no País Vasco e cando chegaron para pasar uns días, atoparon a casa toda desfeita. Entráranlle por unha xanela. 

"Na mesma semana dous en Tomeza, que está aquí abaixo, e outro en Bértoa".

En xeral, non foron botíns grandes, pero o susto, o desgusto e a sensación de inseguridade lévana ao lombo.

"Colles medo e o que están facendo é por alarmas, que tamén é un pouco de negocio... estes días  por aquí puxeron varias".

Os catro detidos pasaron á disposición xudicial en Pontevedra.