Un morto e dous feridos moi graves na A-8 en Guitiriz ao atropelar un guindastre uns operarios de conservación
ÚLTIMA HORA
Un morto e dous feridos moi graves na A-8 en Guitiriz ao atropelar un guindastre uns operarios de conservación
O suceso produciuse ao chocar un camión guindastre, que portaba vehículos, contra unha furgoneta de conservación de estradas
A circulación quedou cortada nun dos carrís da A-8 en sentido Asturias
Un operario do servizo de conservación de estradas perdeu a vida e outros dous quedaron feridos moi graves nun accidente de circulación que tivo lugar na A-8, ao seu paso por Pígara, no concello lugués de Guitiriz.
Outras dúas persoas quedaron feridos leves, segundo o 112. O condutor do guindastre precisou tamén de asistencia sanitaria. Tres dos feridos foron trasladados o Hospital Lucus Augusti.
Ao parecer, o guindastre colidiu coa furgoneta dos operarios, que estaban realizando unha obra na vía.
🔴#AXEGAInforma dun atropelo mortal
— 112 Galicia (@112Galicia) January 30, 2026
📍 A-8, km 587, Pígara, Guitiriz
➡️ Coche contra guindastre. 1 operario falecido e 2 feridos
🚨 Urxencias Sanitarias de Galicia-061, @guardiacivil de Tráfico, #Bombeiros Vilalba, #GESFriol-Palas, #ProtecciónCivilGuitiriz pic.twitter.com/YNBc57BJZm
O sinistro tivo lugar as dúas da tarde no quilómetro 587, dirección Asturias, xusto no enlace coa N-634. A circulación quedou cortada nun dos carrís da A-8 en sentido Asturias, provocando que o tráfico polo outro carril fose máis lento.
Ata o lugar desprazáronse efectivos de Urxencias Sanitarias de Galicia-061, Garda Civil de Tráfico, GES de Friol-Palas e Protección Civil de Guitiriz. Tamén foron avisados os Bombeiros de Vilalba, pero finalmente non foi necesaria a súa intervención.
