A gasolina marca un novo máximo histórico malia o desconto do Goberno

A gasolina alcanzou un novo máximo histórico tras encadear sete semanas de subidas e venderse a un prezo medio de 1,848 euros o litro, a pesar de que esa cantidade incorpora a bonificación de 20 céntimos por litro imposta polo Goberno.

Ademais, e segundo os datos difundidos este xoves polo Boletín Petroleiro da Unión Europea (UE), que recolle o prezo medio rexistrado en máis de 11.400 estacións de servizo españolas entre o 31 de maio e o 6 de xuño, o gasóleo véndese en España unha vez aplicado o desconto a unha media de 1,716 euros o litro.

Con estes prezos, o custo da gasolina, que volve superar o gasóleo, aumenta un 4,5 % respecto da semana anterior e bate a marca de 1,844 rexistrado o pasado marzo; mentres que o gasóleo é un 3,9 % máis caro tras subir por primeira vez no último mes. 

Motero abre a porta a impor unha recarga a eléctricas e petroleiras

A ministra de Facenda María Jesús Montero abriu a porta a impor unha recarga a eléctricas e petroleiras se se demostra que están a ter beneficios "non xustificables".

"Haberá que ver para o ano que vén", nos Orzamentos de 2023, "se temos que poñer en marcha algún tipo de achega adicional por parte das grandes petroleiras ou as grandes empresas de electricidade se efectivamente están a ter marxes de beneficio que neste momento poidan ser non xustificables", sinalou a ministra nunha entrevista en Telecinco.

Ademais da posibilidade de impor esta recarga, que non detallou, Montero asegurou que o Goberno manterá a bonificación ao prezo dos carburantes mentres os prezos se manteñan elevados.