O Banco Central ruso limita a 10.000 dólares a retirada das contas en divisas

O Banco Central ruso anunciou este mércores que limita a 10.000 dólares o máximo que un cliente poderá sacar en moeda estranxeira en efectivo nas súas contas de divisas.

"Un cliente pode sacar ata 10.000 dólares dos EUA en divisa en efectivo, e o resto dos fondos en  rublo, segundo o tipo de cambio do mercado do día do retiro", di o comunicado do emisor ruso.

Esta limitación faise efectiva desde este xoves 9 de marzo ata o 9 de setembro próximo. Polo tanto, a norma divulgada esta madrugada, xa non permite aos clientes dos bancos facer retiradas por enriba dese límite.

Ademais, "os bancos durante a vixencia da nova orde non van vender divisas en efectivo aos cidadáns". "O ingreso dos dólares ao país está limitado polas sancións, e é o único motivo das medidas especiais relacionadas coa venda de divisas en efectivo polos bancos", agrega o comunicado do Banco Central ruso.

A medida afecta compañías estranxeiras como Inditex, que decidiron abandonar o país. Unha situación que xa pasa factura á cotización da compañía. As súas accións retrocederon ao nivel máis baixo en nove anos. E os analistas calculan que perderá un 20 % dos seus beneficios brutos.

O presidente ruso, Vladimir Putin, xa prohibira o pasado 28 de febreiro transferir divisas ao estranxeiro e ordenara ás empresas con actividades económicas no estranxeiro no marco do comercio exterior converter o 80 % dos seus ingresos en rublos, segundo un decreto asinado este luns polo mandatario para defender a Rusia das sancións occidentais.

A nova norma do Banco Central ruso adóptase tras a decisión da Unión Europea, os Estados Unidos e numerosos países máis de impoñer sancións económicas a Rusia pola súa invasión de Ucraína.

Desde que se iniciou a invasión, a UE expulsou sete bancos rusos do sistema interbancario, entre os que non están Sberbank, a maior entidade do país, nin a Gazprombank, porque procesan gran parte das operacións enerxéticas co bloque. Ademais, conxelou os activos do Banco central ruso en territorio comunitario. 

Pola súa banda, o presidente dos Estados Unidos, Joe Biden, anunciou este martes, do mesmo xeito que o Reino Unido, a prohibición das importacións estadounidenses de "petróleo, gas e enerxía" de Rusia pola invasión de Ucraína.

A prohibición das importacións enerxéticas de Rusia por parte dos EUA súmase ás sancións económicas adoptadas recentemente contra Moscova en coordinación cos socios europeos, entre elas as restrición das operacións internacionais do banco central ruso e a suspensión de determinados bancos rusos do sistema internacional SWIFT.