O Kremlin rexeita as modificacións europeas ao plan de paz dos Estados Unidos

O Kremlin rexeitou este luns as modificacións introducidas polos países europeos ao plan de paz para Ucraína presentado polos Estados Unidos.

"No que se refire aos plans que circulan por aí, esta mañá tivemos coñecemento do plan europeo, que, a primeira vista, é absolutamente non construtivo, non nos convén", dixo Yuri Ushakov, asesor internacional do Kremlin, á prensa local.

O diplomático considerou "lóxico" que agora os estadounidenses se poñan en contacto con Moscova "para reunirse e comezar a discusión de maneira presencial".

"Sabemos que hai certos sinais respecto diso, pero non existe un acordo concreto sobre un encontro entre representantes rusos e estadounidenses", sinalou, ao engadir que o Kremlin non recibiu propostas sobre "quen e cando ten intención de vir a Moscova".

Subliñou que Rusia recibiu o plan orixinal de 28 puntos que recolle "os entendementos que foron alcanzados en Alaska", onde tivo lugar o cume en agosto pasado entre os presidentes ruso, Vladimir Putin, e estadounidense, Donald Trump.

"Moitas, eu diría que non todas, pero moitas das cláusulas dese plan parécennos totalmente aceptables", sinalou sobre o plan orixinal que foi refutado por Kiev e os europeos ao consideralo demasiado prorruso.

Con respecto a outros puntos do plan orixinal dos EUA, "por suposto requiren unha discusión e unha análise en grao sumo pormenorizada entre as partes".

Ao mesmo tempo, considerou "natural" que o plan orixinal "sexa modificado con cambios pola nosa banda, seguramente tamén por parte ucraína, e pola parte estadounidense e europea".

Do mesmo xeito que fixese esta mañá o portavoz do Kremlin, Ushakov asegurou que existen moitas "especulacións" respecto diso e que as autoridades rusas só cren o que recibiron "polas correspondentes canles" oficiais.

Cambios con respecto o ingreso de Ucraína na OTAN

O plan que Washington presentou a Moscova rexeitaba categoricamente o ingreso de Ucraína na OTAN, mentres a nova versión deixa espazo a unha decisión consensuada dos países membros da Alianza Atlántica.

Ademais, obrigaba a Ucraína a abandonar todo o Donbás, cando as súas tropas aínda controlan en torno ao 20 % do territorio da rexión de Donetsk.

Iso si, ambos os plans non contemplan unha declaración dun cesamento do fogo ata que ambos os bandos acepten o plan de paz.

Aínda que tras coñecerse a existencia do plan, Putin respondeu primeiro desprazándose a un posto de mando para coñecer a marcha da ofensiva rusa en Ucraína, despois asegurou que pode servir de base "para o arranxo pacífico definitivo" do conflito.

Require "unha análise exhaustiva", afirmou ao reunirse o venres co Consello de Seguridade de Rusia.

Os Estados Unidos e Ucraína informaron nun comunicado conxunto que, como resultado das conversacións mantidas o domingo en Xenebra, os dous países elaboraron "un marco de paz actualizado e perfeccionado".

"Calquera acordo futuro debe respectar plenamente a soberanía de Ucraína e lograr unha paz xusta e sostible", sinalaba a nota oficial.