O PP recupera a alcaldía de Manzaneda 18 anos despois cunha moción de censura
Pedro Yáñez asume a Alcaldía tras prosperar a iniciativa presentada polos populares e dous edís non adscritos
Amable Fernández afirma que marcha “coa cabeza alta” e anuncia unha oposición construtiva
O PSdeG levará ao pleno da Deputación unha moción contra o transfuguismo
O PP recuperou este luns a Alcaldía de Manzaneda 18 anos despois ao saír adiante a moción de censura presentada polos populares e dous concelleiros non adscritos contra o rexedor socialista Amable Fernández.
O voceiro popular, Pedro Yáñez, converteuse no novo alcalde tras defender que a moción é un “mecanismo democrático” para corrixir un rumbo que, segundo explicou, o PP considera necesario cambiar.
Yáñez criticou que o proceso derivase nunha “telenovela vitimista” e reprochou actitudes que, ao seu xuízo, “menosprezaron” a membros da corporación. Sinalou que non existe unha confrontación persoal, senón unha decisión política para modificar a xestión municipal.
A moción, prevista inicialmente para o 29 de outubro, quedara suspendida por unha medida cautelar do Xulgado do Contencioso Administrativo nº 1 de Ourense. O tribunal estimara que podían existir causas de nulidade, polo que o pleno quedou aprazado ata a celebración deste luns.
Fernández denuncia un cambio “por interese persoal”
O exalcalde socialista Amable Fernández asegurou que abandona o cargo “coa cabeza alta” e insistiu en que a moción non responde ao que votaron os veciños. Indicou que o PSdeG exercerá unha “oposición construtiva” e advertiu de que non ve motivos de peso para xustificar o relevo.
Fernández sostivo que a iniciativa responde a “intereses persoais”. Defendeu que, malia ser legal, considera que a operación resulta “eticamente e moralmente reprochable”.
O exrexedor advertiu que os dous concelleiros tránsfugas “non gobernarán nada” e lembrou que, se o intentan, o partido acudirá aos tribunais.
O PSdeG levará o debate ao pleno da Deputación
O líder provincial socialista, Álvaro Vila, anunciou que o Grupo Provincial Socialista presentará unha moción na Deputación de Ourense contra o transfuguismo político tras o acontecido en Manzaneda. Cualificou a operación de “esperpéntica” e acusou o PP de incumprir o Pacto Antitransfuguismo.
Vila advertiu que este episodio “marcará un antes e un despois” nas relacións entre socialistas e populares na provincia e reclamou ao presidente da Deputación, Luis Menor, que clarifique responsabilidades. Tamén apuntou a supostas “contradicións internas” dunha decisión que definiu como contraria aos principios democráticos.
