Fracasan as dúas mocións de censura da esquerda francesa contra Lecornu polos orzamentos
O primeiro ministro recorrera a un mecanismo constitucional para evitar ter que levar as contas o Parlamento
Sebastien Lecornu, este venres (REUTERS/Gonzalo Fuentes)
As dúas mocións de censura, unha das formacións á esquerda do Partido Socialista (PS) e outra da extrema dereita, contra o Goberno do primeiro ministro francés, Sébastien Lecornu, fracasaron este venres na Asemblea Naciona
A moción de censura das formacións á esquerda do Partido Socialista (PS) contra o Goberno do primeiro ministro francés, Sébastien Lecornu, fracasou este venres na Asemblea Nacional ao recibir o voto de 269 deputados, fronte aos 288 necesarios.
A moción da Francia Insumisa (LFI), dos Ecoloxistas e do Partido Comunista Francés (PCF) recibiu tamén os votos da estrema dereita da Agrupación Nacional (RN) e dos seus socios, e igualmente doutros deputados, en particular cinco socialistas dos 69 que hai nese grupo parlamentario.
En canto á moción de censura do RN, quedou con 142 sufraxios, moi lonxe da maioría absoluta necesaria, xa que a esquerda nunca apoia as da extrema dereita.
As dúas presentáronse despois de que Lecornu recorrese a un mecanismo constitucional (o artigo 49.3) para adoptar a parte dos ingresos dos orzamentos de 2026 sen sometelos ao voto tras convencerse de que non lograría reunir unha maioría parlamentaria.
O primeiro ministro subliñou nese debate que os orzamentos que decidiu adoptar non son os do proxecto inicial que pretendía sacar adiante o seu Executivo, senón "un texto saído do compromiso" e "resultado dos equilibrios do hemiciclo".
