Putin nega que compartise información dos servizos de intelixencia con Irán durante a guerra
Trump preguntoullo a Putin por teléfono despois de que medios como The Washington Post publicaran que Rusia estaría subministrando información para atacar as bases estadounidenses en Oriente Medio
O presidente ruso, Vladímir Putin, negou durante unha chamada co seu homólogo estadounidense, Donald Trump, que compartise intelixencia con Irán sobre a guerra, asegurou este martes o enviado especial da Casa Branca Steve Witkoff.
"Onte, na chamada co presidente, os rusos dixeron que non estiveran compartindo información", declarou Witkoff nunha entrevista coa cadea CNBC, durante a que engadiu: "Podemos confiar na súa palabra".
A conversa telefónica entre Trump e Putin produciuse despois de que medios como The Washington Post publicasen que Rusia estaría subministrando información para atacar as bases estadounidenses en Oriente Medio.
Sobre esa chamada, Trump dixo que foi "moi boa" e que Putin "quere ser útil no tema de Irán".
Segundo explicou o asesor do Kremlin Yuri Ushakov, Putin formuloulle a Trump "varias propostas para un rápido arranxo político do conflito iraniano".
A conversa, a primeira entre ambos os líderes en 2026, durou preto dunha hora e foi "franca" e "construtiva", segundo Ushakov.
Putin mostrou este luns o seu "inquebrantable apoio" á república islámica tras o nomeamento do novo aiatolá, Mojtaba Jameneí, fillo do asasinado Alí Jameneí, e este martes falou por teléfono co presidente iraniano, Masud Pezeshkian.
