Os EUA pechan a embaixada en Kuwait tras os ataques de Irán en Arabia e Bahrein

Os Estados Unidos anunciaron este martes o peche indefinido da súa embaixada en Kuwait, en plena onda de ataques de Irán a obxectivos estadounidenses no Golfo Pérsico como represalia pola guerra iniciada no seu país por Washington e Tel Aviv.

"Debido ás tensións continuas na rexión, a embaixada estadounidense en Kuwait queda pechada ata novo aviso. Cancelamos todas as citas consulares regulares e de emerxencia. Emitiremos un aviso cando a embaixada retome as operacións normais", indicou a misión diplomática na súa conta da rede social X.

O anuncio chegou horas despois de que a embaixada dos Estados Unidos na veciña Arabia Saudita fose atacada por dous drons, o cal ocasionou un pequeno incendio e danos materiais menores no edificio, sen que se informase de vítimas.

A embaixada estadounidense en Kuwait advertira xa este luns de que existía unha ameaza continua de ataques con mísiles e drons contra o rico país petroleiro e pediu que non se visite a legación.

O domingo, o Departamento de Estado ordenou a saída de Kuwait do persoal non imprescindible da súa embaixada e os seus países e o luns pediu aos cidadáns estadounidenses que abandonasen inmediatamente 14 países e territorios de Oriente Medio, incluídos Kuwait e Arabia Saudita, debido a graves riscos para a súa seguridade.

O cuarto día de guerra comezou co anuncio de que Arabia confirma danos na embaixada dos EUA en Riad, mentres que Irán asegura que destruiu unha base militar en Bahrein. Tamén proseguen os ataques do exército de Israel contra Teherán e Beirut, despois de que Hezbollah anunciase o envío de drons contra unha base israelí e de que a Garda Revolucionaria de Irán afirmase que dedstruíu unha sede militar dos EUA en Barhein.

Ata primeira hora do martes sucedéronse bombardeos cruzados con distintos obxectivos. Os Estados Unidos e Israel continuaron á súa vez centrados en ofrecer diferentes xustificacións do ataque conxunto do sábado contra Irán, que foron rebatidas por Teherán.

Estes son os últimos acontecementos da guerra:

Hezbollah reivindica un ataque contra unha base israelí, bombardeos contra Teherán e Beirut

- O exército de Israel continúa atacando este martes tanto a capital iraniana como Beirut, segundo informou nun comunicado castrense. "A forza aérea israelí iniciou ataques selectivos contra obxectivos militares do réxime terrorista iraniano e da organización terrorista Hezbollah".

- O grupo xiíta libanés Hezbollah reclamou antes a autoría dun ataque contra a base aérea israelí de Ramat David. Na súa páxina web oficial, Hezbollah indicou que atacou en resposta á agresión criminal israelí contra decenas de cidades e aldeas libanesas, incluíndo os suburbios do sur de Beirut.

- Segundo o comunicado, o ataque tivo lugar á 05:00 hora local (03:00 GMT) cun escuadrón de drons.

Irán anuncia o golpe á base dos EUA en Barhein e ataque á embaixada dos EUA en Riad

- A Garda Revolucionaria de Irán anunciou este martes pola mañá que lanzara unha vaga de ataques contra unha base militar dos Estados Unidos en Barhein e afirmou destruíla, un novo golpe despois de que Arabia Saudita confirmase que a embaixada estadounidense en Riad sufriu un ataque con drons e Washington pedise aos seus cidadáns abandonar Oriente Medio. 

- "Neste ataque, 20 drons e tres mísiles golpearon os obxectivos, destruíndo o principal edificio de mando e os cuarteis de base área dos Estados Unidos e incendiando os seus depósitos de combustible", afirmou a Garda Revolucionaria nun comunicado recollido pola axencia iraniana Fars.

Trump alardea de subministración ilimitada de armas

- O presidente dos EUA Donald Trump alardeou o martes de madrugada de que o seu país ten unha subministración ilimitada de armas e de que as reservas de municións nunca foron máis altas.

- "Segundo me informaron, temos practicamente unha subministración ilimitada destas armas. As guerras poden ser loitadas para sempre, e con éxito, usando só estas subministracións (que son mellores que as mellores armas doutros países!)", escribiu Trump na súa rede Truth Social.

Os Estados Unidos e Israel xustifícanse e Irán contéstalles

- O ministro de Exteriores iraniano Abbas Araqchi rexeitou este martes as acusacións de que o seu país fose atacar os EUA, realizadas polo secretario de Estado estadounidense Marco Rubio, que xustificou a operación militar como un movemento preventivo.

- "Rubio admitiu algo que todos sabiamos: Os Estados Unidos decidiron entrar na guerra a favor de Israel. Nunca existiu unha suposta ameaza de Irán contra Os Estados Unidos", dixo Araqchi na rede social X.

- Segundo o secretario de Estado, Washington sabía que Israel se dispoñía a atacar a Irán e que Teherán ía responder con bombardeos contra bases estadounidenses en Oriente Medio. Por iso, afirmou, Donald Trump tomou a "sabia decisión" de golpear primeiro.

- O enviado especial estadounidense para Oriente Medio Steve Witkoff asegurou o luns a Fox News -hora dos EUA- que Irán tiña grandes cantidades de uranio para a fabricación de ata 11 bombas nucleares e dixo que estaba claro que sería imposible chegar a un acordo.

- O primeiro ministro israelí Benjamin Netanyahu dixo así mesmo que Teherán se atopaba construíndo búnkeres subterráneos en novas localizacións para o seu programa nuclear, tamén a Fox News.

742 mortos en Irán, segundo HRANA

- A Media Lúa Vermella iraniana informou o luns de que 555 persoas morreron na guerra no país persa, mentres que a ONG opositora con sede nos Estados Unidos HRANA situou este martes as vítimas mortais en 742, ademais de 971 feridos.

- As cifras continúan sendo provisionais debido ás restricións de acceso, a interrupción case total de Internet e as dificultades para a verificación independente sobre o terreo.