Nais de Maside mudan as esperas nos pavillóns polas canchas de xogo
Fartas de ser sempre as que miraban os partidos dos seus fillos e fillas decidiron poñerse do outro lado formando o seu propio equipo de fútbol sala
Xa debutaron na liga provincial e agora son os seus pequenos os que as animan dende a bancada
Son de Maside, en Ourense, e dende setembro mudaron a bancada polo terreo de xogo. Estaban fartas deses tempos mortos mentres agardaban polos seus fillos e fillas durante os adestramentos de fútbol. Agora forman o equipo feminino de fútbol sala sénior Terras de Maside. Teñen adestramentos e tamén partidos durante as fins de semana.
Saír ao terreo de xogo é todo un reto para elas. Pero na bancada, tamén están os mellores seareiros. Levan dous partidos e dúas derrotas. Pero o único gol que marcaron nesta tempada é a mellor das recompensas.
E o ánimo non o perderán nunca, porque o obxectivo para elas xa está cumprido.
