Galicia asume a competencia dos permisos de traballo a estranxeiros este xoves

Galicia asumirá este xoves as competencias para conceder permisos de traballo a estranxeiros. O obxectivo é axilizar os trámites e ampliar os perfís para as vacantes de emprego difíciles de cubrir. Segundo os últimos datos, en Galicia hai arredor de 2.000 vacantes en postos de difícil cobertura.

"A asunción da competencia en materia de autorizacións de traballo vai supoñer un fortalecemento do mercado laboral. Por unha banda axilizando todos os trámites que teñen ver con esas autorizacións, mediante a creación da oficina de atracción do talento e, ao mesmo tempo tamén, co acompañamento que lles damos ás empresas galegas de xeito similar ao que estamos xa facendo a través do programa Retorna no que se refire aos galegos do exterior", afirma José González, conselleiro de Emprego,

Ao asumir as competencias para conceder permisos de traballo a estranxeiros, o Goberno galego busca axilizar o trámite e aumentar o número e a variedade de perfís dispoñibles para as ofertas de traballo que máis custa cubrir.

Galicia será a terceira comunidade en asumir esta competencia, que ata agora só se transferira a Cataluña e ao País Vasco.

Xunto aos permisos de traballo a estranxeiros, Galicia asumirá as competencias sobre os aeródromos e heliportos que non son de interese xeral.