Deteñen dous homes por filtrar datos persoais de ministros e dirixentes do PSOE

A Policía Nacional detivo este martes na provincia das Palmas dous homes pola súa presunta participación na filtración de domicilios, teléfonos, números de DNI e direccións de correo electrónico de ministros e militantes socialistas e implicados no caso Koldo.

Segundo informa a Policía Nacional na súa rede social de X, a investigación, a cargo da Audiencia Nacional, atópase baixo segredo de sumario dirixida polo maxistrado Francisco de Jorge despois de que os axentes acharan a semana pasada nunha canle de Telegram datos persoais de varios ministros, da presidenta do Congreso, Francina Armengol, do presidente da Generalitat Cataluña, Salvador Illa, e de implicados no caso Koldo.

🚩Detenidas dos personas por su presunta participación en la filtración de datos personales relacionados con altas personalidades del Estado y del Gobierno

La investigación, a cargo de la Audiencia Nacional, se encuentra bajo secreto de sumario pic.twitter.com/oOT4DLXUIE

— Policía Nacional (@policia) July 1, 2025

Entre os afectados tamén hai xornalistas, así como o exnúmero tres do PSOE Santos Cerdán, o exministro José Luis Ábalos, o seu exasesor Koldo García e o empresario e presunto comisionista Víctor de Aldama, os catro investigados no Tribunal Supremo polo denominado caso Koldo.

Trataríase dunha segunda filtración de datos despois de que o 19 de xuño se producira unha primeira difusión de información reservada nunha canle de Telegram que afectou a outros membros do Goberno como a vicepresidenta María Jesús Montero, os ministros Fernando Grande-Marlaska, Óscar Puente, Luis Planas, Diana Morant, Ana Redondo e Elma Saiz, e tamén exdirixentes do PP como María Dolores de Cospedal ou Rafael Catalá, entre outros.

Esta primeira filtración produciuse desde unha canle de Telegram con máis de 92.000 seguidores e foron publicados por un usuario que se identifica na canle con pseudónimo e se republicaron por outro usuario despois.