O 59 % da rede de estradas de Galicia está en estado grave, o segundo peor dato do estado
Só Aragón está en peores condicións, cun 69 % da súa rede en mal estado
Un estudo alerta da deterioración estrutural e superficial de máis da metade das estradas españolas
Imaxe de arquivo dos veciños de Friol protestando polo estado das estradas en xaneiro de 2024
O 59 % da rede de estradas de Galicia presenta un estado grave de conservación, segundo un estudo da Asociación Española da Estrada.
Esta porcentaxe sitúa Galicia como a terceira comunidade con peores resultados, só por detrás de Aragón (69 %) e ao mesmo nivel que Castela-A Mancha.
O informe sinala que, a nivel estatal, existen 33.966 quilómetros cunha deterioración moi grave do pavimento, case o triplo dos 12.000 rexistrados hai tres anos. Estas vías necesitan unha reconstrución urxente nun prazo inferior a un ano debido a alteracións estruturais (como fochancas ou o chamado "efecto pel de crocodilo") e superficiais (fendas lonxitudinais e transversais, e perda de materiais).
Actuacións necesarias en máis da metade da rede estatal
Ademais, o estudo identifica outros 20.407 quilómetros que tamén presentan danos graves e nos que se debería intervir nun prazo máximo de catro anos. En total, a investigación conclúe que en catro anos habería que actuar en 54.373 quilómetros, máis da metade dos 101.700 que conforman a rede viaria española.
A AEC advirte de que o estado actual das estradas é o peor desde finais dos anos 80 e principios dos 90, cando se desenvolveu o último gran Plan Xeral de Estradas. Calcula que o déficit acumulado en conservación ascende a 13.491 millóns de euros, agravado polo aumento do prezo das materias primas, da enerxía e do persoal.
As comunidades con peores datos de conservación son Aragón, Castela-A Mancha e Galicia.
