Un condutor perde o control e esnáfrase contra un farol en Ourense
O accidente, no que non houbo feridos, obrigou a cortar o tráfico na rúa Curros Enríquez durante unha hora
Os veciños de Ourense aínda están conmocionados polo accidente rexistrado no centro da cidade a carón do parque de San Lázaro. Un coche que circulaba pola zona perdeu o control, invadiu a beirarrúa e acabou impactando contra un farol, que caeu sobre a calzada. Afortunadamente, non se rexistraron feridos.
O condutor explicou que perdeu o control do coche, que era automático. A Policía Local abriu unha investigación para esclarecer as causas exactas do sinistro.
Foi necesaria a intervención dos bombeiros para retirar o vehículo e o mobiliario urbano afectado. A rúa permaneceu cortada ao tráfico durante aproximadamente unha hora.
Na contorna, a palabra máis repetida é “milagre”, xa que o suceso puido ter consecuencias moito máis graves, dado o lugar e a hora en que se produciu.
