Declaran secretas as dilixencias sobre a filtración dos datos de ministros do PSOE e exdirixentes do PP

O xuíz da Audiencia Nacional Francisco de Jorge decretou o secreto das dilixencias que abriu este venres para investigar a filtración e publicación, nunha canle de Telegram con máis de 92.000 seguidores, dos datos persoais e teléfonos de sete ministros socialistas e de varios exdirixentes do PP.

Fíxoo horas despois de que recaeran no seu xulgado as pescudas que a Policía Nacional puxo en coñecemento da Audiencia Nacional en relación a estes feitos, que poderían atentar contra a Seguridade do Estado.

A Policía Nacional fíxose cargo da investigación nada máis coñecerse este xoves a filtración e publicación deses datos, que afectan á vicepresidenta primeira e ministra de Facenda, María Jesús Montero, e aos ministros do Interior, Fernando Grande-Marlaska; Transportes e Mobilidade Sostible, Óscar Puente; Agricultura, Pesca e Alimentación, Luis Planas; Ciencia, Innovación e Universidades, Diana Morant; Igualdade, Ana Redondo; e Inclusión, Seguridade Social e Migracións, Elma Saiz.

Na mesma listaxe foron publicados datos de exdirixentes do PP como Elvira Rodríguez, María Dolores de Cospedal, Rafael Catalá, Isabel García Tejerina e Ana Pastor.

As mensaxes con eses datos apareceron publicados á primeira hora da mañá do xoves por un usuario que se identifica na canle con pseudónimo e republicáronse por outro usuario unha hora despois.

Segundo adiantou o diario Público, o grupo de Telegram onde apareceron estas mensaxes é utilizado polos seus usuarios para difundir publicacións relacionadas coa actividade política de Alvise Pérez, así como para atacar o Goberno ou divulgar mensaxes xenófobas.