Unha canle de Telegram publica os datos persoais e teléfonos de sete ministros
A Policía abriu dilixencias na Audiencia Nacional dada a gravidade da información exposta que afecta, entre outros, á actual vicepresidenta primeira do Goberno, María Jesús Montero
A Policía Nacional investiga xa a filtración e publicación deses datos
Unha canle de Telegram con máis de 92.000 seguidores publicou os domicilios, teléfonos, números de DNI e direccións de correo electrónico de sete ministros socialistas e de varios exdirixentes do PP.
A Policía Nacional investiga xa a filtración e publicación deses datos, que afectan á vicepresidenta primeira e ministra de Facenda, María Jesús Montero, e aos ministros do Interior, Fernando Grande-Marlaska; Transportes, Óscar Puente; Agricultura, Luis Planas; Ciencia, Innovación e Universidades, Diana Morant; Igualdade, Ana Redondo; e Inclusión, Seguridade Social e Migracións, Elma Saiz.
No mesmo listado, publicáronse datos de exdirixentes do PP como Elvira Rodríguez, María Dolores de Cospedal, Rafael Catalá, Isabel García Tejerina e Ana Pastor.
As mensaxes con eses datos foron publicados por un usuario que se identifica na canle con pseudónimo e se republicaron por outro usuario unha hora despois.
O grupo de Telegram onde apareceron estas mensaxes é utilizado polos seus usuarios para difundir publicacións relacionadas coa actividade política de Alvise Pérez, así como para atacar ao Goberno ou divulgar mensaxes xenófobas.
