Consumo publica as empresas sancionadas con 350.000 euros polo Black Friday de 2023
Nesta campaña, o Ministerio vai supervisar se os operadores soben o prezo dos produtos antes do Black Friday para logo rebaixalos ao seu prezo orixinal
Jesús Hellín/Europa Press
O Ministerio de Dereitos Sociais, Consumo e Axenda 2030 fixo públicos este venres cinco dos sete nomes das empresas que foron multadas cun total de 350.000 euros por subir o prezo dos produtos para logo rebaixalos ao seu prezo orixinal durante o Black Friday de 2023.
Trátase de Mediamarkt, Carrefour, PC Componentes, Notino Italia e Gestaweb 2020, ás que á sanción económica se engade unha sanción accesoria de publicidade e prohibición ás empresas de reiteraren estas prácticas, explica o departamento de Pablo Bustinduy.
Consumo puxo en marcha para este Black Friday unha campaña de monitorización e vixilancia para evitar fraudes aos consumidores.
En concreto, a Dirección Xeral de Consumo vai supervisar, a través dun varrido tecnolóxico, se os operadores soben o prezo dos produtos antes do Black Friday para logo rebaixalos ao seu prezo orixinal, ademais doutros patróns escuros ilícitos, como os prezos por goteo, técnicas de venda baixo presión, prezos dinámicos ou prezos personalizados baseados en datos persoais.
Son prácticas que reducen a transparencia e buscan inducir a erro á persoa consumidora ou que tome decisións de compra precipitadas, sinala o ministerio.
Esta campaña continúa a liña das inspeccións levadas a cabo en anteriores edicións e que concluíron este verán con sete expedientes sancionadores a operadores de comercio a través de internet por modificaren os prezos de forma enganosa.
Consumo explica que a natureza das sancións permite que se fixese pública a identidade de cinco das sete empresas multadas por infracción da Lei Xeral para a Defensa dos Consumidores e Usuarios referente ao uso de prácticas comerciais desleais cos consumidores ou usuarios.
De maior a menor importe, as empresas sancionadas foron Notino Italia con 110.000 euros; Gestaweb 2020, con 100.000; Media Markt, con 25.000; Carrefour, con 21.500 e PC Componentes, con 1.500.
Á sanción económica engádese unha sanción accesoria de publicidade, polo que se difunde tamén o nome da marca; tamén foron obrigadas a retirar as falsas rebaixas publicadas no seu momento, por seren enganosas e desleais cos consumidores.
En Consumo advirten de que en promocións e descontos debe usarse como prezo de referencia (o prezo tachado a partir do cal se calcula o importe do desconto) o menor prezo que se mostrou nos últimos 30 días.
Estas prácticas fraudulentas, abusivas, enganosas ou ilegais estarán sancionadas de forma grave con entre catro e seis veces o beneficio ilícito obtido.
O punto de mira desta campaña estará nos operadores de comercio electrónico e en especial nos produtos do téxtil, xoguetes, tecnoloxía e pequenos electrodomésticos.
