Chourizos de cabazo, un manxar típico desta época en varias comarcas de Ourense

Din que do porco se aproveita todo, e con esa filosofía naceron estes chourizos convertidos hoxe nun auténtico manxar.

Iago Danta, de Embutidos A Matanza, en Riós, leva anos elaborándoos. Emprégase a carne da papada dos porcos e outros recortes que se adoban con pemento doce e picante, ourego e sal. Por último engádeselle o cabazo picado que déixase escorrer durante 24 horas para que perda a auga. Representa un 30 por cento da mestura. Embútese na tripa gorda que tamén ten que estar un día enteiro en auga antes de empregala. E despois cúranse nun fumeiro tradicional, con leña de carballo, entre 20 días e un mes. Trátase dun embutido, típico do inverno, que só se come cociñado.

É tal a demanda que nesta empresa ourensá elaboran ata mil cincocentos quilos de chourizos cabaceiros á semana durante os catro meses de máis frío, entre novembro e febreiro. Moitos envíanos para fóra e outros consómense na zona.

O restaurante Gandainas de Riós tenos entre os seus pratos estrela nestas datas. Mariví López, entre os fogóns, di que os cociñan con grelos e patacas, acompañando o caldo ou como parte do cocido. Cócense, iso si, á parte, durante uns 20 minutos, para que non rompan. Destaca a textura e o sabor que lle confire o cabazo mesturado coas carnes mas fortes.