Moncloa di que "España ten os recursos necesarios para afrontar un embargo" de Donald Trump
"Os EUA deben respectar ás empresas privadas e os acordos conxuntos coa UE" aseguran fontes do Executivo
O presidente Pedro Sánchez fará unha declaración institucional este mércores para pronunciarse sobre os últimos acontecementos
A Comisión Europea confía en que Estados Unidos respecte os seus compromisos comerciais
Matias Chiofalo / Europa Press
O Goberno español respondeu ás ameazas lanzadas este martes polo presidente dos Estados Unidos de América, Donald Trump.
O executivo di que se quere suspender o comercio con España, o presidente americano debe respectar ás empresas privadas e os acordos selados co conxunto da Unión Europea.
España ten recursos para "axudar aos sectores afectados"
Fontes da Moncloa replican a Trump que España conta cos recursos necesarios para "conter posibles impactos" e tamén para axudar aos sectores que se poidan ver afectados e diversificar as cadeas de subministración".
Engadiron esas mesmas fontes que se o Goberno estadounidense quere suspender relacións de comercio con España "terá que facelo respectando a autonomía das empresas privadas, a legalidade internacional e os acordos bilaterais entre a Unión Europea e os EUA".
Declaración do presidente Sánchez
O presidente do Goberno español fará unha declaración institucional este mércores, 4 de marzo, para facer unha valoración dos últimos acontecementos internacionais, segundo trasladan fontes de Moncloa. Pedro Sánchez dirixirase aos cidadáns ás 9 horas nunha intervención sen preguntas.
España rexeitou que os EUA utilicen as bases militares de uso conxunto de Rota e Morón tras a escalada de violencia en Oriente Próximo e o presidente Donald Trump respondeu, ameazando cun "embargo" a España e un posible corte de toda relación comercial.
A Comisión velará polos intereses da Unión Europea
A Comisión Europea confía en que os EUA respecten os seus compromisos comerciais, segundo declarou a EFE o portavoz comunitario de Comercio, Olof Gill.
"Esperamos que os Estados Unidos respecten os compromisos contraídos na nosa declaración conxunta. A Comisión velará en todo momento por que se protexan plenamente os intereses da Unión Europea", dixo Olof Gill.
O portavoz europeo de Comercio manifestouse nese sentido tras as ameazas de Trump a España despois de que o Goberno lle negase utilizar as bases compartidas de Rota e Morón para a guerra con Irán.
