A película 'Romería', de Carla Simón, chega aos cines tras pasar por Cannes

Este venres chega aos cines Romería, participada pola TVG, e unha das tres películas candidatas a representar a España nos Óscar.

Rodada en Vigo, Romería reflicte as orixes e raíces galegas da directora Carla Simón. A historia parte cando a protagonista viaxa a Vigo para coñecer a familia de seu pai biolóxico, que morreu da sida, igual que súa nai. A película estreouse no pasado Festival de Cannes, candidata á Palma de Ouro.

Simón aborda aquí a vida de seus pais biolóxicos a quen apenas coñeceu e morreron vítimas da heroína e a sida. O filme é unha película reparadora en que quixo levar ao celuloide o que non puido vivir canda eles. Un traballo feito desde a empatía e mesmo o recoñecemento.

Rodada en Vigo e arredores, tamén boa parte do cadro técnico é galego e moitos dos seus actores: Janet Novás, Sara Casasnovas, Miriam Gallego, Tristán Ulloa ou José Ángel Egido. 

Os seus protagonistas Llúcia García e Micht fixeron un grande esforzo con meses de ensaio para poder revivir os anos oitenta e os tempos da movida e da heroína, tan alleos á súa xeración.