O director de cine Julio Medem deixa a súa pegada no Festival de Cans

O cineasta vasco Julio Medem deixou este sábado o seu sinal no Festival de Cans coa colocación dunha estrela no singular paseo da fama desta aldea do Porriño que dá nome a un dos certames audiovisuais máis populares de Galicia.

A visita do director de obras como 'Os amantes do círculo polar' ou 'Lucía e o sexo', gañador dun premio Goya co seu debut 'Vacas' fai xa máis de trinta anos, foi un dos actos centrais do último día da programación do Festival de Cans.

Durante a tarde, Medem compartiu un coloquio cos asistentes ao certame no que avanzou que xa está a traballar no desenvolvemento dun novo proxecto cinematográfico.

"Agora mesmo estou a mover proxectos. Hai unha nova película sobre dous pelotaris vascos, 'Jai Alai'", comentou o director cos presentes, a quen lles pediu que lle desexen "sorte" para poder comezar coa rodaxe en 2027.

O cineasta donostiarra tamén exaltou as virtudes dun festival, o de Cans, do que dixo que "non se pode comparar con nada".

"Faláranme bastante deste festival, pero non hai nada como chegar aquí e darse conta de que supera todo o que podías imaxinar", remarcou Medem, protagonista absoluto dunha xornada que tamén incluíu concertos, retrospectivas dedicadas ás figuras homenaxeadas nesta edición, como Jaione Camborda ou Celso Bugallo, e actividades paralelas.

O certame tamén contou coa presenza de cargos institucionais, como o conselleiro de Cultura, Lingua e Xuventude, José López Campos, que felicitou á dirección do festival por exhibir o rural galego "sen complexos" e con éxito.

A vixesimoterceira edición do Festival de Cans pecharase esta noite co acto de entrega dos premios da competición oficial de curtametraxes. 

Julio Medem posa co conselleiro de Cultura e o presidente da Deputación de Pontevedra. EFE/ Brais Lorenzo