Cae unha rede de estafas bancarias a través do móbil cun detido na Coruña

A Garda Civil desartellou en Alacante unha rede dedicada a cometer estafas bancarias a nivel internacional mediante o método 'smishing', unha serie de ciberataques que utilizan as mensaxes de texto para enganar os usuarios, infectar os seus equipos e roubarlles datos e cartos. Das oito detencións realizadas, unha delas foi na Coruña.

A operación deu comezo en abril de 2020, despois de que os autores realizaran durante tres días consecutivos un ataque masivo a un gran número de clientes dunha entidade bancaria española, a través dos seus teléfonos móbiles.

Os presuntos conseguiron estafarlles 600.000 euros a un total de 106 prexudicados de todo o territorio nacional.

A organización enviaba unha mensaxe de texto ás vítimas facéndose pasar polo seu banco e así poder rexistrar os datos necesarios para acceder ás súas contas. Toman o control das súas contas desde a plataforma en liña e modifican o xeito de acceso.

A rede facía transferencias de 5.000 euros cada unha a persoas utilizadas como 'mulas de diñeiro', dadas de alta en empresas financeiras en liña que recibían unha comisión a cambio de realizar a transferencia.

Os investigadores localizaron ata 28 mulas e comprobaron que polas súas contas bancarias pasaron 462.000 euros dos cartos estafados aos prexudicados. Outros 128.000 euros foron estafados co mesmo método a distintos comercios en París.

Investimento en criptomoedas

A organización investía os cartos en criptomonedas para poder branquealos sen deixar rastro para os investigadores. As moedas virtuais logo eran transferidas a contas de membros dos principais membros da banda, que lograban deste xeito permanecer no anonimato.

Hai identificadas 90 persoas de nacionalidades letoa, rusa, checa, kazaxa, bielorrusa, francesa, alemá, camerunesa e ucraína.

En España, a Garda Civil detivo oito persoas, de entre 40 e 59 anos, de nacionalidades española, romanesa e ucraína nas localidades de Málaga, Sevilla, Murcia, A Coruña, Zaragoza, Xirona, Valencia e Elxe. Ademais, 25 contas bancarias puxéronse a disposición xudicial.

Por outro lado, os axentes solicitaron á autoridade xudicial 43 ordes internacionais de detención correspondentes aos principais integrantes do grupo criminal.