A muller que se tirou pola ventá no Barco tiña no peito coiteladas previas

Ela tampouco estaba no sistema VioGén, porque non denunciara, pero problemas si que había. Confírmano amigos da vítima e tamén o feito de que a muller estivera só unhas horas antes no cuartel da Garda Civil do Barco, pedindo información para a separación. Mesmo parece que comprara os billetes ou quería compralos para volver a Colombia, a súa terra, onde segue vivindo a nai.  Polo visto, a el non lle gustou esa decisión e discutiron. 

Segundo contaron varias testemuñas, escoitaron un berro pedindo auxilio e xa viron como a muller corría cara á terraza e se lanzaba ao baleiro dende un cuarto andar. Despois sóubose que tiña varias coiteladas no peito. Quixo fuxir do horror, pero as lesións da caída foron fatais.

Polo menos o fillo da parella, de só cinco aniños, non estaba na casa. De momento, alleo ao drama familiar, está cun amigo do colexio. A avoa vén de camiño, para facerse cargo da situación.

A vítima ten 35 anos. O seu agresor, 43. Levaban ano e medio vivindo no Barco, despois de pasar outros catro en Madrid.