Detido un home despois de que a súa parella se precipitara desde un cuarto piso no Barco de Valdeorras
Detido un home despois de que a súa parella se precipitara desde un cuarto piso no Barco de Valdeorras
A muller, de 35 anos, foi trasladada a un centro sanitario en estado grave
A Garda Civil investiga se se trata dun novo episodio de violencia machista, xa que, segundo testemuñas presenciais, ela pediu auxilio e houbo unha pelexa previa entre ambos
A vítima non figura no Sistema de Seguimento Integral nos casos de Violencia de Xénero (VioGén) nin constaban denuncias previas
Un home foi detido este martes despois de que a súa parella se precipitase desde o cuarto piso dun edificio situado na praza de Andrés de Prada, na localidade ourensá do Barco de Valdeorras.
Fontes próximas á investigación confirmaron a Europa Press que o home foi detido despois destes feitos, que sucederon sobre as 12:30 horas.
A Garda Civil investiga se se trata dun novo episodio de violencia machista, segundo informa o instituto armado, xa que segundo testemuñas presenciais, a muller, de 35 anos, pediu auxilio, e houbo unha pelexa previa entre ambos.
O Concello do Barco convocou unha concentración para este mércores as doce horas como acto de repulsa ante "esta agresión" que afectou a unha veciña que se lanzou "ao baleiro desde a terraza" da casa na que residía, indica un comunicado.
Ata o lugar, ademais da Garda Civil e da Policía Local, acudiron tamén sanitarios do Servizo de Urxencias Sanitarias de Galicia-061. A muller, colombiana, do mesmo xeito que o home, foi trasladada ao Hospital do Barco en estado grave e, a continuación, foi evacuada en helicóptero a un centro hospitalario de Vigo.
As forzas e corpos de seguridade abriron unha investigación para tratar de esclarecer o sucedido. Segundo fontes consultadas por Europa Press, a vítima non figura no Sistema de Seguimento Integral nos casos de Violencia de Xénero (VioGén) nin constaban denuncias previas.
.png)
