Suspenden o desafiuzamento dunha inquilina morosa na Coruña polo atraso de 5 minutos do cerralleiro
A xestora xudicial aprazou o desaloxo porque o cerralleiro non estaba
O xulgado ten previsto proceder ao desafiuzamento esta semana
A dona do piso leva 5 anos sen cobrar o alugueiro
O pesadelo de Pilar comezou en maio de 2020. Daquela foi cando a súa inquilina deixou de pagarlle o alugueiro desta vivenda do barrio coruñés dos Mallos. Denunciouna e ditouse unha sentenza de desafiuzamento. Porén a inquilina declarouse vulnerable e o proceso paralizouse.
Finalmente conseguiu unha orde de desafiuzamento contra a súa inquilina e ía producirse o mércores pasado, contra as dez da mañá. Pero non foi posible. Todo se veu abaixo en cuestión de cinco minutos. Ese foi o tempo que agardou a xestora xudicial. Porén, como o cerralleiro non chegou a tempo, o desafiuzamento non se puido levar a cabo.
Así que o seu avogado achegouse aos xulgados, que están a escasos metros da vivenda, á procura dunha solución. Parece que esta semana se vai proceder ao desafiuzamento.
Pilar conta xa os días para sacar de enriba a lousa coa que, segundo di, leva cargando máis de cinco anos.
