Adiar o primeiro móbil dos 11 aos 13 anos rebaixa á metade os usos problemáticos futuros
A idade media de acceso aos teléfonos móbiles está actualmente arredor dos once anos
Máis do 80% das familias está a favor de prohibirlles o acceso ás redes sociais e aos dispositivos móbiles aos menores de 14 anos.
Xa en 2010 fíxose en Galicia un dos primeiros estudos sobre o impacto da tecnoloxía en idades temperás. A partir de aí, os datos das condutas de risco e os problemas foron medrando canda a preocupación familiar. A razón da alarma social é que se está vendo que son máis os contras que os pros, como explica un dos maiores expertos, Antonio Rial, profesor da Facultade de Psicoloxía da USC.
Están aparecendo atrasos no desenvolvemento da linguaxe, atrasos a nivel de comprensión lectora, de lecto-escritura, desenvolvemento psicomotor. Está perdendo de xogar, de interactuar cara a cara, dunha maneira sa que o vai axudar a desenvolverse como persoa.
A maior responsabilidade recae na familia que ademais de esixir que administracións, empresas e plataformas cumpran a lei, ten que actuar na casa con normas, supervisión e o seu exemplo pero, sobre todo, atrasando o acceso ao primeiro móbil que en España está arredor dos once anos.
Simplemente retardar dos once anos aos trece implica case diminuír á metade a taxa de usos problemáticos. Un de cada tres rapaces dinos que á hora de cear ou xantar, os pais están tamén co móbil ou co whatsapp. Neses rapaces as condutas de risco multiplícanse e os patróns de uso problemático tamén son maiores.
A OMS considérao un enorme problema de saúde pública cun impacto incuestionable na saúde mental.
Cando o uso é frecuente, intensivo e masivo e non hai contrapeso na casa hai sufrimento desde o punto de vista emocional.
Canto ao uso da tecnoloxía na aula, xa hai voces en Europa e América que recomendan volver a darlle máis peso á lectoescritura tradicional, ao traballo manual, ao contacto coa natureza e á interacción cara a cara.
