Prisión para un galego interceptado en Zamora con 55 quilos de cocaína
O home deu positivo en drogas nun control da Garda Civil en Rionegro del Puente
Levaba a substancia oculta en dúas maletas no maleteiro do coche
O Xulgado de Primeira Instancia e Instrución número 1 de Puebla de Sanabria decretou prisión provisional sen fianza para un veciño de Galicia de 47 anos que foi sorprendido con 55 quilos de cocaína durante un control viario en Rionegro del Puente.
Axentes da Garda Civil detiveron o vehículo no quilómetro 49 da A-52 nun operativo de vixilancia do tráfico e detección de consumo de alcol e drogas.
O condutor, que viaxaba só, deu positivo en cocaína tras as probas practicadas.
No rexistro do coche, os gardas localizaron no maleteiro dúas maletas que contiñan 47 paquetes plastificados. Tras a incautación, o home foi detido e posto a disposición xudicial.
O xulgado decretou o seu ingreso inmediato en prisión provisional sen fianza mentres continúa a investigación.
