Galicia xa ten controlados todos os incendios e segue por segundo día sen ningún activo

Galicia xa conseguiu controlar todos os seus incendios forestais, tras controlar esta mañá os da Pobra de Brollón e Avión, e continúa sen incendios activos por segundo día consecutivo.

O último balance da Consellería do Medio Rural recolle que o incendio da Pobra do Brollón foi controlado ás 13:17 horas, tras afectar a 900 hectáreas, e o de Avión, de 250 hectáreas, aínda antes, ás 10:55 horas.

Tamén está restablecida a circulación na liña Monforte de Lemos-Ponferrada, que se viu interrompida polo incendio da Pobra.

Ademais, permanecen controlados os incendios de Carballeda de Valdeorras-Casaio, que calcinou 5.000 hectáreas desde que entrou na comunidade galega procedente de Porto de Seabra, e o de Larouco, o máis grande da historia de Galicia con 30.000 hectáreas queimadas.

En igual situación continúan o de Chandrexa de Queixa, e os de Oímbra e Xinzo de Limia, A Mezquita-A Esculqueira, Carballeda de Avia e Beade, Maceda, Montederramo-Paredes e Vilardevós-Vilar de Cervos.

As lapas arrasaron en xullo e agosto unhas 96.500 hectáreas

Os datos de vivendas afectadas son 144, das que oito eran habituais e 42 segundas residencias. O resto estaban en ruínas ou abandonadas.

Rueda tamén informou na súa comparecencia de que 400 persoas foron evacuadas nalgún momento da vaga de incendios; e producíronse "algo máis de 2.000 confinamentos".

Arredor de media ducia de explotacións gandeiras, alboios ou naves doutro tipo víronse afectadas en maior ou menor medida polas lapas.

Hai 32 persoas que están a ser investigadas e 11 detidos como presuntos responsables de incendios.