Sortea un remolque de 4.592 botellas de cervexa polo aniversario da súa cafetería
A dona do establecemento, situado en Pobra de San Xiao, en Láncara, reparte as rifas entre os seus clientes
O agasallo está valorado en tres mil euros e será o 1 de agosto cando se coñeza o gañador, nunha festa con música en directo
Caixas e caixas de cervexa vai carretar Neurka ata xuntar 4.592 botellas.
Son as que sorteará mediante rifas que reparte entre os seus clientes.
Explica Neurka Fernández, a promotora desta iniciativa, que "sorteamos un remolque de cervexas valorado en tres mil euros o 1 de agosto. Fixen vinte cinco mil rifas para dar durante dous meses e xa van repartidas algo máis de dezaseis mil".
Os clientes están encantados coa iniciativa.
O que non están é sorprendidos porque en anteriores aniversarios esta hostaleira que ten o seu negocio en Pobra de San Xiao, en Láncara, xa fixo varios sorteos pouco comúns.
Asegura Neurka que "sorteei dous burros, unhas vacas cachenas, mil euros en efectivo e o ano pasado un remolque de leña".
O gañador coñecerase o día 1 de agosto, nunha festa con música en directo. Terá para beber case trece cervexas ao día durante un ano.
