A autopsia dos tres falecidos de Taboadela esclarecerá se morreron polos gases do xerador

Francisco Dacal, de 81 anos, era un home moi querido e coñecido en Taboadela, e tamén a súa familia, a súa muller, de 81 anos, e o seu fillo, de 56. Os tres faleceron na súa vivenda na noite do corte eléctrico histórico. A Garda Civil investiga que aconteceu exactamente, pero xa se poden considerar vítimas colaterais da falta de luz. Veciños e amigos lamentan a traxedia. 

"Este home era boísimo, este era malo para el, do demais, mellor non o había. Porque era electricista e se lle facía falta calquera cousa, ía onda el e non tiña un non para ninguén", asegura Berardo Vila, veciño e amigo de Francisco e a súa familia.  

"Pola tarde (o xerador), estaba fóra, pero despois á noite co medo de que se por se acaso llo roubaban, metérono dentro", explica Bernardo. 

"Trouxéronllo e dixeron que tiñan a porta cerrada, e morreron os tres", di apenada outra veciña de Taboadela. 

O home, cunha enfermidade pulmonar, precisaba unha máquina para recibir osíxeno. E o xerador eléctrico que lle solicitou esa tarde ao Concello parece que foi fatal. 

"Se o deixasen fóra ao mellor non pasaría o que pasou. Do baixo cara a arriba ten unhas escaleiriñas, esa porta debeu quedar aberta ou algo pasou e veu o que veu", lamenta Bernardo. 

Os resultados das autopsias axudarán a esclarecer as causas da morte. Á falta de que conclúa a investigación, a inhalación dos gases do xerador é a principal hipótese. Segundo puidemos saber o grupo electróxeno foi atopado polos servizos de emerxencias no interior da casa no soto da vivenda.

A investigación da Unidade Orgánica da Policía Xudicial e a Instrución dun Xulgado de Ourense esclarecerán o ocorrido. Está previsto que este mércores haxa uns actos litúrxicos na capela do tanatorio en Ourense e o xoves será o funeral na localidade de Vilar de Santos.