A declaración de seca prolongada mantense e a situación é "preocupante"

A declaración de seca prolongada mantense e a situación é preocupante. Os encoros de abastecemento están por debaixo da media desde hai meses e en peor situación ca na seca do ano 2017.

A falta prolongada de chuvias xunto o aviso por altas temperaturas destes días fai que as autoridades chamen a facer un uso responsable da auga.

A conca Galicia-Costa é a que máis preocupa, pero hai dous encoros aos que se está especialmente atentos, os dous no sur de Galicia, na zona de Vigo: os encoros de Zamáns e Baiona. 

"Estes son os que máis nos preocupan, son os que están nunha situación peor ao 2017, teñen pouca capacidade de almacenaxe de auga e son poboación que en verán duplicar ou triplican a súa poboación", di Teresa Gutiérrez, directora de Augas de Galicia.

Os caudais circulantes de xuño estaban por debaixo dos valores habituais para esta época do ano, cun 25% menos. En maio foi peor: os caudais estaban nun 45% por debaixo da media histórica.
A Xunta segue a facer un chamamento para evitar consumos de auga innecesarios.

"Aínda que nos custe ver xardíns menos regados, restrinxir regos, hai xeitos de limpar as rúas que non son baldeos, restrinxir lavados de coches, á hora de encher piscinas", engade Teresa Gutiérrez.

A situación de seca prolongada supón un “aviso precoz” para anticiparse ante un posible episodio futuro de escaseza de auga.

"En outubro ten que comezar a chover, o normal é que no no hidrolóxico comece a chover. O que pasou no ano 2017 é que non comezou a chover ata decembro, e iso preocuparíanos moito, aí si que habería que estar moi atentos e quizais tomar medidas máis excepcionais", asegura a directora de Augas de Galicia.