Os cans guía, os aliados fundamentais para os discapacitados visuais

O último mércores do mes de abril celébrase o Día Internacional do Can Guía. É unha xornada para resaltar a importancia dos cans guía como aliados fundamentais para os discapacitados visuais, promovéndolles a autonomía, a mobilidade e a igualdade de acceso á vida cotiá. Este ano, desde a ONCE reivindican o seu dereito de acceso aos establecementos de alimentación.

Actualmente para acceder a un can guía, adestrados desde que nacen durante uns dous anos, hai unha lista de agarda de entre 5 e 6 anos. Cómpre ademais cumprir uns requisitos, como ter unhas calidades de mobilidade necesarias para poder camiñar ao ritmo do can ou saber andar con bastón.