Condenan a 26 anos de cárcere o culpable da morte de Cristina Cabo

A sección segunda da Audiencia Provincial de Lugo condenou, de conformidade co veredicto do Tribunal do Xurado, a 26 anos de cárcere ao home que asasinou a Cristina Cabo, de 42 anos, na súa vivenda en 2022.

De conformidade co veredicto emitido polo Tribunal do Xurado, declarou probado que o acusado, que foi condenado como autor dun delito de asasinato e doutro de roubo con violencia, contactou sobre as 5:40 horas do 27 de novembro de 2022 coa vítima nas proximidades da rúa Falcón, nunha das zonas de lecer nocturno de Lugo, dirixíndose ambos á vivenda da muller.

Na sentenza, a presidenta do tribunal relata que, tras un lapso temporal aproximado dunha hora, mantendo relacións sexuais consentidas, se iniciou unha discusión entre ambos, no transcurso da cal a muller pediulle que abandonase a vivenda.

Entre o acusado e a vítima comezou unha liorta, conseguindo o sospeitoso coller un coitelo e, con ánimo de matar á muller, causoulle 29 feridas. Ademais, a sentenza salienta que, no momento do acoitelamento, o condenado presentaba "intacta" a súa capacidade de entendemento.

A maxistrada recoñece que Cristina Cabo non puido exercer resistencia ante a desproporción en forza física e a inxesta de bebidas alcohólicas e destaca que o condenado lle asestou “diversas coiteladas, a maior parte delas de escasa entidade, innecesarias para causarlle a morte, para, deste xeito, aumentar intencionada e deliberadamente a dor da vítima”.

A iso engade que, “guiado polo propósito de enriquecerse, atopándose a muller moribunda, e aproveitando a violencia previa e na mesma relación de inmediatez e unidade temporal que lle facilitaba a conduta”, tras buscar no interior da vivenda, procedeu a apoderarse dun computador e dunha bicicleta.

A sentenza non é firme, pois cabe presentar recurso ante o TSXG.

A acusación particular di que a condena é "xusta e ben motivada"

Fernanda López, avogada que exerceu a acusación particular en nome da familia de Cristina Cabo, considerou este luns que a condena a 26 anos de cárcere é "xusta" e "está ben motivada".

"Valóroa positivamente. É certo que non se alcanzan os trinta anos de cárcere que pediamos tanto a acusación particular como a Fiscalía, pero é unha pena considerable. Estou satisfeita coa sentenza", dixo a letrada.

"Está claro que se fixo xustiza no momento en que o condenan por asasinato, con dúas agravantes, e polo roubo con violencia", agregou López.

"Nunca vas poder resarcir a familia da perda, pero é unha sentenza bastante xusta, iso é evidente. E está ben motivada, ademais", afirmou.

En canto á posibilidade de presentar recurso ante o Tribunal Superior de Xustiza de Galicia para que a pena de cárcere sexa aínda máis dura, indicou que, nun principio, non se contempla esta opción.