Deteñen o sospeitoso do asasinato da lexisladora Melissa Hortman en Minnesota

O gobernador de Minnesota Tim Walz anunciou este domingo a captura de Vance Luther Boelter, de 57 anos, principal sospeitoso de asasinar a lexisladora demócrata Melissa Hortman e o seu marido nun suburbio de Brooklyn Park o venres á noite.

Boelter, que na madrugada do sábado tamén atacou a tiros o senador estatal John Hoffman e a súa esposa, foi detido no condado de Sibley tras unha intensa operación de procura que involucrou centenares de axentes.

Así o facía saber a policía do Condado de Ramsey a través dunha publicación de Facebook na que agradecía a colaboración das distintas axencias de seguridade para dar co sospeitoso, afirmando que están un paso máis preto de que se faga xustiza.

Nunha declaración pública, o gobernador Walz condenou as accións impensables de Boelter, que terminaron coa vida dunha muller que “moldeou o núcleo do que somos como Estado”.

“Non podemos volvernos insensibles a isto. Somos unha nación profundamente dividida”, afirmou Walz nunha declaración publicada na súa conta de X.

“Non avanzamos con odio nin con violencia, senón con humildade, graza e civilidade”, agregou.

Aos familiares das vítimas, Walz expresoulles a súa solidariedade e sinalou que Minnesota enteira está de loito. Tamén agradeceu aos corpos de seguridade pola súa valentía e profesionalismo: “Salvaron vidas”, subliñou.

“Mentres sandamos, non deixaremos que o medo gañe”, concluíu. “Debemos avanzar en honra a Melissa, con comprensión, servizo, e, por encima de todo, con humanidade”.

Durante a xornada do domingo as unidades de policía buscaron nunha zona rural de Minnesota a Vance Luther Boelter, de 57 anos, un director dunha empresa de seguridade e predicador, que segundo o gobernador Mike Walz, actuou por motivacións de violencia política.