Xaneiro deixa 60.400 parados máis en España co remate da campaña do Nadal

Segundo os datos publicados este venres polo Ministerio de Inclusión, Seguridade Social e Migracións, xaneiro deixa 60.404 parados máis co fin da campaña do Nadal e 231.250 afiliados menos de media á Seguridade Social. 

Este descenso do emprego, centrado na hostalería e o comercio, é o máis elevado para un arranque de ano desde 2020, e deixa o total de afiliados en 20,6 millóns.  Con todo, é unha das subas máis moderadas para ser un mes de xaneiro con  2.767.860 persoas rexistradas nas Oficinas do Servizo Público de Emprego Estatal (SEPE).

En termos interanuais, o paro rexistrou un descenso de 140.537 persoas, mentres que a afiliación avanza en 523.537 persoas. 

Aumenta o desemprego nos servizos e entre os mozos 

Por sectores, o incremento do paro concentrouse entre os traballadores que proviñan dos servizos (58.721 desempregados máis), cunha escasa achega da agricultura (1.256 máis) e a industria (440 máis), así como do colectivo sen emprego anterior (1.221 máis). Pola contra, o paro diminuíu na construción, en 1.234 persoas. O paro feminino aumentou en 41.904 mulleres, ata os 1,6 millóns de desempregadas, en tanto que o masculino sumou 18.500 homes, ata rozar os 1,11 millóns. Entre os mozos, o desemprego incrementouse en 7.189 persoas ata os 201.154, a cifra máis baixa para un mes de xaneiro da serie histórica.

O paro aumenta en todas as comunidades menos nas Baleares 

Por comunidades, o paro aumentou en todas as comunidades menos nas Baleares. Os maiores incrementos rexistráronse en: Andalucía (20.077), Madrid (9.646) e na Comunidade Valenciana (4.363).

En Galicia subiu un punto menos que a media. O número de parados rexistrados nas oficinas galegas dos servizos públicos de emprego subiu en 1.597 persoas en xaneiro, en relación co mes anterior tras o fin da campaña de Nadal, o que supón un aumento do 1,23 % fronte ao 2,23% rexistrado a nivel nacional.

Segundo os datos publicados este venres polo Ministerio de Traballo e Economía Social, Galicia conta na actualidade cun total de 131.101 desempregados, 13.937 menos que en xaneiro de 2023, o que representa unha caída do 9,62 % nun ano. Este descenso tamén é superior ao rexistrado a nivel estatal, cunha baixada interanual do 4,83 %.

Por provincias, foi A Coruña onde máis creceu o paro, con 696 desempregados máis en xaneiro, un 1,34 % máis. Con todo, no último ano reduciu as súas cifras en 5.733 persoas, ata 52.563 parados, un 9,83 % menos. En Lugo hai na actualidade 12.820 persoas sen emprego, 435 máis que hai un mes (+3,51 %), pero 1.005 menos que hai un ano (-7,27 %). Situación similar viviu Ourense, con 15.387 parados, un 367 máis que en decembro (+2,44 %) e 1.191 menos que en xaneiro de 2023 (-7,18 %). Na provincia de Pontevedra hai na actualidade 50.331 desempregados, 99 máis que en decembro (+0,2 %), e 6.018 menos que hai un ano (-10,68%). Do total de parados galegos, un 57,9% é muller e un 3,96 % ten menos de 25 anos.

 Maiores caídas do emprego en hostalería e comercio

En canto ao emprego, por actividades, os maiores descensos da afiliación déronse en hostalería, 46.594 ocupados menos, seguidos de comercio cun caída de 45.093 afiliados e de actividades administrativas e servizos auxiliares, cun retroceso de 42.552 ocupados. O descenso da afiliación foi algo maior entre as mulleres, 119.879 ocupadas menos ata os 9,73 millóns, que entre os homes cunha caída de 111.371, ata os 10,86 millóns.