Xa se poden calcular as cotizacións, e así quedan as cotas de autónomos en 2023

A Tesourería Xeral da Seguridade Social puxo en marcha un simulador para que os traballadores autónomos calculen a cota que lles corresponderá co novo sistema de cotización por rendementos netos que entra en vigor en xaneiro de 2023.

Segundo explica o Ministerio de Inclusión, Seguridade Social e Migracións, o simulador permite estimar a cota indicando o tramo en que se atopan e os rendementos que se espera obter.

Con estes datos, o simulador ofrece a cota mínima e máxima por cada tramo correspondente e detállase a desagregación das cotizacións (continxencias comúns, continxencias profesionais, cesamento de actividade e formación profesional) e a base de cotización.

Tamén se poden coñecer as prestacións a que se ten dereito.

O novo sistema de cotización acordouse o verán pasado no diálogo social e forma parte das recomendacións do Pacto de Toledo de 2020.

A reforma establece que nos próximos tres anos se despregará de forma progresiva un sistema de 15 tramos que determina as bases de cotización e as cotas en función dos rendementos netos do autónomo, como transición ao modelo definitivo de cotizacións por ingresos reais que se completará como moi tarde en nove anos.

O tramo máis baixo, para rendementos iguais ou inferiores a 670 euros mensuais, parte dunha cota de 230 euros en 2023 para pasar a 225 euros en 2024 e a 200 euros en 2025, mentres que o tramo máis alto para rendementos superiores a 6.000 euros parte dunha cotización de 500 euros o ano que vén, que soben a 530 o seguinte e se sitúan en 590 ao final do período.