O porto da Coruña adxudica a ampliación do peirao de Langosteira para o traslado de Repsol
A obra, cun orzamento de 10,1 millóns de euros, permitirá habilitar un punto de atracada de graneis líquidos
Ampliación do peirao de Punta Langosteira. Autoridade Portuaria da Coruña
O consello de administración da Autoridade Portuaria da Coruña adxudicou este venres as obras de prolongación do peirao do porto exterior, que posibilitará o traslado completo da terminal de Repsol desde Santo Diego ata Langosteira.
Ademais, acordou a prórroga que solicitou Figrupo Mariñas para a súa concesión na dársena de Oza.
A prolongación do peirao A3 do porto exterior ten o obxectivo de habilitar un punto de atracada de graneis líquidos, cumprindo así a programación prevista para completar o traslado da terminal marítima de Repsol.
Execución de 12 meses
A obra ten un prazo de execución de doce meses e foi adxudicada á UTE integrada por Dragados, OHL/SATO e Prace. O orzamento é de 10,1 millóns de euros, lográndose unha rebaixa de case un millón de euros sobre o importe de licitación.
"Ten ademais a singularidade de que será a primeira obra do sistema portuario español que aplica criterios de contratación pública ecolóxica para o formigón e o aceiro", sinala a institución provincial.
