Volve a Ourense o Rally de Automóbiles Clásicos e Antigos

Polo centro de Ourense este sábado puidéronse ver máis de medio cento de vehículos antigos, modelos desde os anos 50 ata os 80. Chegados de toda Galicia e o norte de Portugal, participan nunha nova edición do Rally de Automóbiles Clásicos e Antigos cunha ruta polas estradas da provincia.

Os coches clásicos volveron encher a Praza Maior de Ourense. Tras dous anos de pandemia e con moitas ganas, os amantes do motor recuperan a súa cita co Rally de Automóbiles Clásicos e Antigos.

Preparados para participar nunha xornada de ruta ata Celanova, acoden 63 coches antigos de toda Galicia e o norte de Portugal con modelos míticos desde os anos 50 ata os 80. E chega Rogelio no seu clásico, o máis antigo e rechamante. É un Rolls Royce do ano 1939 en perfecto estado e "moi silencioso", asegura o seu dono. 

E máis que para a competición, que tamén, veñen para amosar as súas xoias de automoción e gozar da súa afección. 

"A nosa función dentro da escudería, ademais de que gocemos cos clásicos, é fomentar que a xente os coide, que os conserve e, se hai que restauralos que se restauren", di Francisco Fernández, o presidente da Escudería de Clásicos de Ourense. 

"É un pouquiño como un neno pequeno, que o agarimas, que o preparas, que o acondicionas... É un 'hobby' marabilloso", asegura un dos participantes. 

Percorren primeiro a rúa do Paseo de Ourense, para saír na proba de regularidade uns, e outros van simplemente polo pracer de conducir.