Viveiro restrinxe o consumo de auga tras a vertedura de xurro ao río Landro

O concello de Viveiro estableceu este sábado a restrición do uso da auga do abastecemento local co obxectivo de preservar a seguridade e a saúde da poboación logo de chegar unha vertedura de xurro ao río Landro.

Nun bando municipal, a alcaldesa comunica á veciñanza que a auga da traída non se debe utilizar para inxerir (beber ou preparar alimentos), nin para lavar alimentos nin para a hixiene bucodental. Si se pode usar para a hixiene persoal (ducha, lavado de mans) e a limpeza do fogar.

Trátase dunha medida provisional tras activarse unha subministración alternativa por mor da vertedura que afectou este venres o río Landro.

Segundo o Goberno local, esta medida "non implica que exista un problema na calidade da auga" e apunta que a restrición manterase ata a confirmación dos resultados das primeiras analíticas.

A alcaldesa de Viveiro, Marina Gueimunde, este sábado. EFE/Eliseo Trigo

O número de emerxencias 112 recibiu aviso ás 16:00 horas do venres desa vertedura á altura da estación depuradora de Viveiro. Segundo a información facilitada, a auga presentaba unha intensa cor marrón e desprendía un forte cheiro a xurro. 

Ademais, as primeiras medicións apuntaron a niveis moi elevados de amonio.

Fontes de Medio Ambiente precisaron que a vertedura produciuse nunha granxa de Muras onde rachou unha balsa de xurro que derramou 1.000 metros cúbicos a un regato, afluente do Landro. Logo, detectaron a presenza de peixes mortos no curso do río. 

EFE/Eliseo Trigo